Presentación Xixón 5'40
Entama esti mes d'agostu la primer edición del Festival Xixón 5º40' que llega pa quedase y cubrir un espaciu fundamental d'ociu y cultura nel branu de Xixón.
Xixón, antigua capital de los cilúrnigos, ciudá volcada na mar atlántica, ciudá au los sones de la tradición cultural celta siéntense per toles esquines del conceyu, acueye y agospia esti Festival d'hermandá énte los pueblos del Arcu Atlánticu européu. Un festival que tien como obxetivu cimeru amosar la cultura, los vezos d'unos pueblos que mos sentimos xuníos por esa mar que marca los nuesos moos de vida.
Xixón ye ciudá d'acoyida, ciudá de llibertá, esti Festival ye símbolu d'ello como tamién lo ye la cooperación colos pueblos de la Tierra. Les alministraciones públiques tienen que tener el compromisu de tresmitir valores de solidariedá, valores culturales.
Ye esti un Festival pa toos, un Festival abiertu a la fusión, que rescata la esencia del folk atlánticu européu un festival de vanguardia, un amiestu de sones y cultures. Un Festival pa toos y pa toes, pa la xente de Xixón y pa quien venga de fuera, porque Xixón ye una ciudá abierta.
Ye esi meriadianu 5º40' que-y da nome a esta primer edición del Festival una llinia imaxinaria qu'axunta a los pueblos del norte y del sur, llínia que sitúa a Xixón nun marcu xeográficu y cultural únicu nel mundu.
Bienllegaos a Xixón, bienllegaos a la mar atlántica, que los bonos sones vos acompañen nestos díes de cellebración alredor del Primber Festival 5º40'.
Jesús Montes Estrada
Conceyal de Cooperación, Cultura Tradicional y Llingua Asturiana de Xixón
